Jimca Wanaagsan Kheyrkeeda Iyo Barakada Ay Leedahay Eebe Ha Na Waafajiyo Aamiin .. Ducadeyda Shardi Ma Ku Xiri-karaa
Thursday - April 3, 2025
Waxaa jira duco ayna banaanayn in shardi lagu xiro iyo duco la ogol yahay in shardi lagu xiro .. Haddaba waxaynu mid mid u dul-istaagi doonaa labadaas.
1. Ducada shardiga leh ee aan la ogolayn
Ducada shardigu ku xiran ee aan la ogolayn, waa ta aad tiraahdo: ILaahow waxaas i sii haddii aad rabto! Taasina ma aha wax ku habboon asluubta ducada .. Shardigani waxaa uu kasoo horjeeddaa baahidaada iyo niyada aad Rabigaa u hayso.! Ma aha wax uu ku hadlo qof u baahan naxariista ILaahay.
Qofka ducaysanaya waxaa looga baahan yahay in aannu ducadiisa shardi ku xirin, maxaa yeelay Eebbe wuxuu ku siin-doonaa oo keliya haddii uu doonayo, sidaas awgeed, shardiga aad ducada ku xiraysaa waxay keenaysaa in aan lagaa aqbalin .. Waa inaad shardigaa ka saartaa meesha.
Shardiga kale ee ducada lagu xiro oo aan la aqbalin, waxaa weeye: Haddii waxaasi isiiso, wax dambe ku waydiisan maayo! .. Tani waxay u badan tahay marka dhibaato inna taabato; waa adiga oo yiraahda: ILaahow haddii ilmahaygaa Aad caafiso, mar dambe wax ku waydiisan maayo!
Ducada shardigaa leh, waa inaad ka fogaataa, maxaa yeelay waa Baayactan oo lama baayactamaysid Qof Bakhayl ah. Miyaannad ILaahay u baahnayn, xitaa haddii uu ku siiyo ducadan aad shardiga ku xirtay?
ILaahay waad u baahan tahay mar kasta. Dunidana isaga la'aantii joogi maysid. ilbiriqsi kasta oo duniddan aad joogto waad u baahan tahay .. Waa inaad ka saartaa ducadan shardigu ku xiran yahay, waa inaad si toos ah u tiraahdaa: Rabbiyow waxaas baan rabaa.
Ugu dambeyntii, waxaynu ka soo warranay ducooyinka shardiga lagu xiro ee aan la ogolayn .. qormadan ku xigta waxaa aynu ka warami-doonaa, ducooyinka shardiga leh ee la ogol yahay ama banaan.
